JƏJI BALƏ

Muallif: Zümrüyyə Valiyeva
Redaktor: Mirfayaz Likməkani

Çı vişon qıləyədə jəjı balə de həvuşi balə dustiyəti kardedəbe. Əvon hejo ivrədə nəvedəbin iyən hənək kardəbin. Həvuşi balə iminnə kərə jəjıə balə bə nəve beşeədə vindəjbe.
İ kərə həvuşi balə deştə bıyon sənıştone hənək kardedəbe- bunim komımon ən diyəro vite bəzne.
Həvuşi balə de qıləy tovi vitdəbe ki i kərən odyəsəy vindje dəqijyə. Həvuşi balə bino kardə ıştə bıyon hile doy, əmo bəçəy hiley hay doəkəs nıbey. Peşı həvuşi balə tarsəy, çumçıko iminnə kərə be ki, əv co vırədə coyli mandəbe, ay bino karde zurunq - zurunqi bəme. İbirdəmədə vindeşe ki, nezonədə bə kuli xıçon lıvedən, həvuşi balə ıştə inə aspardəyon bə yod vardeşe, əçəy inə votəjbe ki, vişədə qujdhardə həyvonon bedən, əvon ve xətoynin, çəvonku diyəro nəve lozim. Həvuşi balə ıştə sədo bırniye iyən ıştə çəşon deştə qədə çanqon vi kardeşe. Tarsiku larzəy. Əv çı kuliku omə sədon quş doydəbe. Çiçsə rə-rə qəm şodoy, bə həvuşi nez be, bınoj karde əy bukarde.
- Tı bij iyo bəməkəs? Parsəy.
- Aaaaz. Az ıştə moə pidəm, ıştə biyon pidəme. Əmo lovə kardəm mıni məhənən. Həvuşə balə cəvob doy.
Əy bıno karde sıre:
- Ha ha ha, əmo az tıni nıbahardem, mətars - ə sədo votje. Həvuşə balə tarse-tarse çanqonıj ıştə çəşonkuj peğəte, ıştə vədə jəjıə balə vindeje. Jəjıə balə parsəy:
- Çoknə be ki, tı iyo oməyj beşej? Iştı kə koncoye?
- Az dəqjiyəm, deştə bıyon sənıştone hənək kardəbimon - kiy lap diəro bəvite, azən vitim iyən vindeme ki oməym iyo beşəm.
-Bəvədə boy ıştı bıyonro bınəvəmon. Jəjı balə ıştə jiyə ım vıron çok zındəbe, av de həvuşə balə i vırədə əçəy dəvardə ronku dəçəy lınqə rizonnə bə dümo oqardin. Mılxəs, əvon çı həvuşi balə kəy rəsəyn. Bıyon əvoni vindeədə ve şo mandin. Çə rujiku deyəndı dust ben. Əvon hejo çı həvuşi balə dəqijiyə vırədə yəndinə hənək kardero vindemon əkəyn.
Jı vaxt bedəbe ki, həvuşi balon de jəjı balə hənək kardeədə əçəy teğon bə həvuşi balon eştəbin. Jıqo beədə, jəjı balə ve pərt bedəbe, əy bəştə duston ziyonəti vay pidanıbe, əv ve pərişon bedəbe. Əncəxən əçəy həvuşə duston hiç vaxt çəyku qırəy kardənıbin, əmo jəjı ıştəni beçort hisob kardedəbe, çumçuko bə həvuşi balon diyə kardedəbe əvon nam, sipiyə kurkin, bəvon dast jəy ve xoş, əvon reçin bin. Jəjı balə ıştəni dəvon rə-rə no- peğət kardedəbe. Əqar çı jəjıku xəbəjon səbəy bədəy həvuşi balon be pidə? Bəvədə əv ıştə teğonku piye-piye ıştə coni əroxni, kali bə kiysə zədə nırosno həmən bənə bəvon reçin bıçiyo.
Əv bəsə dəştənıbe ki, teğon əçəy zəifə iyən nərmə- nozıkə andomi nığo doyro bəy doa bə, çumçıko ım Xıdodoəy bəy aziyyət doydabe.
İ ruj duston nione (gizlənqaç) hənək kardeadə həvuşi balon kulədə niyo ben, jəjı balə əvoni bəpe pəydo bəkəy. Bı vaxtədə neçi bə hardemon pəydo karde beşəbe. Əv boştə şikori nəveədə bə qıləy kuli rost beşe, çə vırəku bəçəy vıni həvuşə bu oməy. Neçi kuli dılə otır -otır karde, həvuşi balon vindıje. Havuşi balon neçi vindencəxi tarsəyn, avon zikkəjon jəy, komək pidəjonbe. Jəjıə balə nezə vırədə be, əv çı həvuşi balon zikkə məsəy ıştənən tarsəy. Əv zındəbe ki, ve qədəliye , bə hiç ko bə vəc nibomə, əmo ıştə duston mardej pidə nıbey, əvoni vəyo cayli oqəte vite çı dustiyətiku kəno bə ko zındəje.
Iştənədə bə zuj qırdə karde bə neçi və vite ki rə birəso, lovə bıkə bədə neçi nəhə çəy duston. Viteədə əçəy lınqon pepuşiyəyn, av qulu- qulu hardeje, bə neçi rəseyədə həni ıştəni oğəte nıznəje, qulu beynə oməy bə çəy çanqon qıniy. Neçi bə çanqonıj eşə tiyon dojiku jıqo zikkə jəje ki, əçəy sədo vişə həmməy pevlo bey.
Im zikkəku jəjıən ve tarsəy, əmo ıştə duston xilos kardero lınqonsə əşte bə neçi nez be ki, bəy lovə bıkə ki, əçəy dustonıj koy nıbu.
Çı neçi çanqon ve dəjdəbe, əv vindeədə ki jəjıə balə ujən bəy nez bedə, ve tarsəy, jıqo zınəje ki, ujən bəy zəfə bərosney, əve həvuşi balonıj yodo bekay i hestebe, dıjən ğarz kaje, noje vite.
Jəjı hiççi bəsə dənışe, həvuşi balon neçi vite vindeədə ve şo bin:
- Jəjı tı əməni çı neçi çanqono beroxni. Tı əməni xilos karde
-Əmo az hiçi bəsə dənışim. Az bəy sıxan vote pidəbeme əvsə vite.
- Dust, neçi tıku tarsəy, bəçəyro vite, əv jıqo zınəje ki tı bəy ujən zəfə bərosnej.
Duston şoy -şoyku bınojon kay sıre, əvon dıvənqo qəte iyəndı.
-Jəjı, çı xose ki, çəmə bənə tı dustımon heste. Əqər, ıştı tiyon bənəbəyn, bəvədə neçi əməni əhəy. Çəmə dust, ve səğbi, tı qədəli bıbujən ıştıku yolə dıl heste.
Çə rujiku jəjıə balə bəsədəşe ki, bəy Xıdodoə teğon çəy duston neçi çanqo roxneje. Çımi molyəti famdənıbe, ıştə teğon ğədi zındənıbe. Həni jəjı balə ıştəni bevəc zındənıbe!
Sərəsəy ki, ıştəni bo teğonro coqlonku no-peğət karde rost ni! Ve hərəbaxt jiyedəbe!