Məlo Nəsirəddini lətifon

İ ruj məlo noxəş qındə. Doxtor omedə, bayro resept nıvıştə. Məloən bəy i qılə ğızıl doydə. Peşo jeni ğandə bo dəvo səy, bəyən i qılə ğızıl doydə. Jen şedə, dəvo səydə, oqardə. Məlo diyə kardə bə dəvoə şişə, şodoydə çı pencəku bə so.

Jen xəbə səydə:

- Ha Məlo, i qılə ğızıl bə doxtori, i qıləən bə dəvo doy! Bəs boçi əy şodoydəş?

Məlo cəvob doşe:

- Tı jıqo koon ni bəzneş, ha jen. Doxtor bəpe bıjio, bəy qıləy ğızıl dome. Dəvo həvatəkəsən bəpe bıjio. İ qılə ğızılən bə dəvo dome. Dəvo bə beton şodome, çumçiko mınən jiye pidəme.

İ ruj hamsiyonədə I kəs oməy çı Məlo tono:

- Ha Məlo, həy bıdə, tikəy qandımım heste bıbəm bə osiyo.

Məlo dod - əmon karde ki:

- Bəştı con, hə kədə ni. Çəmənən tikəy qandımmon hestbe, əğıli bo kardışe bə həy, bardışe bə osiyo.

Bı dəmədə hə tavlədə zırəy. Həy sədo məsə hamsiyə votşe:

- Məlo, ayb bıbu botı! Hiç xəcolət kəşdəniş, hə tavlədə be-be, bəmı du votedəş? Məlo ğıyzin be, votşe:

- Ayb botı bıbu ki, bənə mı sipirişə merdi haştəj, tavlədə bə həy bovə kardəş.

Qamə tovostoni rujon qıləyədə Məlo şedə bə co di. Mandə qıləy ıştə zınəkəsi kədə. Kə soyb Məloku xəbə səydə:

- Ha Məlo, məvuji bə qam eqınəş; çiç votdəş, ov biyəm peşomoş, ya hıtedəş?

Məlo diyə kardə ki, kə soyb hiç hardeku qəp jəydəni.

Nıştə, votdə:

- Omeədə honi sədə siconi hıtim.

Şəvi i nimədə Məlo tadibəsə jeni oğo kardə ki:

-​ Ha jen rəbi, çaşməği bıdə bəmı!..

Jen xəbə səydə:

-​ Ha merd, şəvi nimədə, toki dılədə çaşməği çiç kardəş?

Məlo votdə:

-​ Jen, rəbi, qıləy çokə hanım vində, əncəx kali vıron toki mandən. Vinde zındənim. Çaşməği bıdə, bıdə çok-çoki diyəkəm.

Məlo vıjorədə da kilo qujd səydə, ğandə bə kə ki, jen se-ço ruj de qujdi xurək bıpato. Jen qırdə kardə hamsiə jenon bəştə sə, qujdi patdən, hardən.

Məlo şanqo kefış soz, omedə bə kə ki, ısə qujdə xurək baha. Bə kə rəsəsati vanq kardə:

-​ Jen, vəşime, xurək ekə, biyə!

Jeni tikəy nun, dı-se səən piyoz vardışe, noşe Məlo vədə. Məlo xəbəş səy:

-​ Jen, bəs qujdı boçi patəni?

Jen votşe:

-​ Sığ bə çımı sə bıqıno. Qujd şıştıme, nome taxtə səpe ki, otəş sənəm. İyən diyə kardıme ki, soxəmandə kıtı qujdış həmə hardə.

Məllo hiçi nıvotə, əşte səpo. Qətşe kıtı, noje bə tavzı. Kəşəje, diyə kardışe ki, kıtı da kiloye. Çəy dumış qəte, bə jeni votşe:

-​ Isə, ıştən de insofi bıvot! Əgər ım kıtıbu, vəs qujd kıve? Əgər ım qujdbu, vəs kıtı kıve?

Qırdə bıkə: Aytən Eyvazon