Məkışt mıni, tolışə kinə

Çı ruşinə honi çəşməş,
Bənə siyo kijə handəş.
Lap ceyroniş, roysə mandəş,
Məkışt mıni, tolışə kinə.

Həm ranqiniş,
Həm sanqiniş,
Həm vanqiniş,
Tolışə kinə.
                                                                                                                                
Sədo bekə şo bıbəmon,
Oxo boçi co bıbamon?
İqlə kədə ho bıbəmon,
Məkışt mıni, tolışə kinə.

Həm tovsoniş,
Həm zımsoniş,
Çımı coniş,
Tolışə kinə.

Ve reçiniş, aləm vində,
Çəşım bətıe, həmmə zındə.
Azən qıləy Xıdo bandə,
Məkışt mıni, tolışə kinə.

Tı otəşiş,
Hərorətiş,
Çımı Həşiş,
Tolışə kinə.

Çordə şəvə Ovşumiş tı,
Məxməriş tı, avşumiş tı,
Az aşığim əncəx bətı,
Məkışt mıni, tolışə kinə.

Həm vıləsəş,
Həm dıləsəş,
Həm xoləsəş,
Tolışə kinə.

Vəyonədə vindəm tıni,
Dəparzındən çəşon mıni.
Maştə beşi bəsə honi,
Məkışt mıni, tolışə kinə.

Anqə çəşiş,
Dıli bəşiş,
Joqo bəy şiş,
Tolışə kinə.

Tolışə kəon pıştənin,
Pınhon məkə ve ıştəni.
Məkə mıni yo kıştənin-
Məkışt mıni, tolışə kinə.

Dılim bəfoş,
Sinəm səfoş,
Dardim dəvoş,
Tolışə kinə.

Mirheydərim, olət dutdəm,
Əncəx botı şeir votdəm.
Iştı roysə con opotdəm,
Məkışt mıni, tolışə kinə.

Az həyotim,
Mehibbətim,
Səxovətim,
Tolışə kinə.

Mirheydər Bəşəru